प्राथमिक शाळांना मिळणार वॉटर फिल्टर ओरोस (सिंधुदुर्ग) - सिंधुदुर्ग जिल्हा परिषदेच्या एक हजार 5 शाळांतील मुलांना आता पिण्याचे शुद्ध पाणी मिळणार आहे. सुमारे दोन कोटी रुपये खर्च करून एवढ्या शाळांना वॉटर फिल्टर पुरविले जाणार आहेत. निधीअभावी जिल्ह्यातील सर्व शाळांचा यात समावेश केलेला नाही. पटसंख्येनुसार या शाळांची निवड करण्यात आली आहे. अलीकडे साथ रोगांचे प्रमाण वाढले आहे. यातील बहुतांश साथरोग अशुद्ध पाण्यामुळे होतात. असा दावा वारंवार आरोग्य विभागाने केला आहे. जिल्हा परिषदेच्या बहुतांश शाळांमध्ये पिण्याच्या पाण्याची सुविधा आहे; परंतु ते पाणी शुद्धच असेल असे नाही. त्यामुळे मुलांच्या आरोग्याला धोका संभवत असतो. अलीकडे बहुतांश मुले वॉटर बॉटल घेवून येत असतात. दप्तरासह पाण्याचे ओझे मुलांना घेऊन यावे लागते. त्यामुळे मुलांना शाळेतच शुद्ध पाणी मिळणे गरजेचे होते. याचा विचार करीत जिल्हा परिषदेने "शुद्ध पिण्याचे पाणी पुरवठा' ही नाविन्यपूर्ण योजना तयार करीत यासाठी जिल्हा नियोजनकडे निधिची मागणी केली होती. यासाठी तत्कालीन शिक्षण सभापती सावी लोके यांनी विशेष मेहनत घेतली होती. पालकमंत्री उदय सामंत यांनी ही योजना मान्य करीत दोन कोटी रूपयांचा निधी मंजूर केला. तो निधी शिक्षण विभागाकडे प्राप्त झाला असून प्रत्यक्ष योजना अंमलबजावणी सुरु झाली आहे. शक्‍यता याच आर्थिक वर्षात ही योजना राबविण्याचा प्रयत्न प्राथमिक शिक्षण विभागाचा आहे. यावर्षी ही योजना राबली तर पुढील शैक्षणिक वर्षापासून जिल्ह्यातील एक हजार 5 शाळांना शाळेतच पिण्याचे शुद्ध पाणी मिळण्याचा मार्ग मोकळा होणार आहे. परिणामी मिलांचा शाळेत वॉटर बॉटल नेण्याचा त्रास वाचणार आहे. तालुकानिहाय आकडेवारी जिल्ह्यातील एकूण एक हजार 5 शाळांत वॉटर फिल्टर बसविले जाणार आहेत. यात देवगड 151, दोडामार्ग 70, कणकवली 161, कुडाळ 171, मालवण 141, सावंतवाडी 141, वैभववाडी 70 आणि वेंगुर्ले 100 अशाप्रकारे तालुकानिहाय शाळांचा समावेश आहे. जिल्हा परिषदेची ही नाविन्यपूर्ण योजना आहे. जिल्हा नियोजनने यासाठी दोन कोटी रुपये मंजूर केले आहेत. ही योजना पूर्णत्वास गेल्यावर तेथील मुलांना शाळेतच पिण्याचे शुद्ध पाणी मिळणार आहे. - एकनाथ आंबोकर, प्राथमिक शिक्षणाधिकारी. संपादन - राहुल पाटील Tajya news Feeds https://ift.tt/eA8V8J

via Tajya news Feeds https://ift.tt/3cYUNUN