साडेसहा लाखांची दारू ओरोसमध्ये जप्त बांदा (सिंधुदुर्ग) - गोवा बनावटीच्या दारूची बेकायदा वाहतूक करणाऱ्या दोन मोटारींवर राज्य उत्पादन शुल्कच्या विशेष कृती पथकाने ओरोस (ता. सावंतवाडी) येथे कारवाई केली. कारवाईत सहा लाख 67 हजार 280 रुपये किमतीची दारू व सहा लाख रुपये किमतीच्या दोन मोटारी असा एकूण 12 लाख 67 हजार 280 रुपये किमतीचा मुद्देमाल जप्त घेतला. ही कारवाई रविवारी मध्यरात्री अडीचच्या सुमारास सापळा रचून करण्यात आली. दरम्यान, अंधाराचा फायदा घेत संशयितांनी पलायन केले. गेल्या दोन महिन्यात राज्य उत्पादन शुल्क विभागाची ही सर्वात मोठी कारवाई आहे. याबाबत अधिक माहिती अशी ः दारूची बेकायदा होत असलेली वाहतूक रोखण्यासाठी राज्य उत्पादन शुल्क विभागाने रत्नागिरी, सिंधुदुर्गसाठी पथक नेमले आहे. सातार्डामार्गे गोवा बनावटीच्या दारूची वाहतूक रविवारी (ता. 7) रात्री होणार असे खात्रीलायक वृत्त पथकाच्या हाती लागले होते. त्यानुसार पथकप्रमुख निरीक्षक व्ही. व्ही. रोकडे यांनी कारवाईसाठी सापळा रचला. रात्री सातार्डा-मळेवाड मार्गावर गस्त ठेवण्यात आली. दरम्यान, मध्यरात्री अडीचच्या सुमारास दोन मोटारी मळेवाडच्या दिशेने जात असताना त्यांना बॅटरीच्या साहाय्याने थांबण्याचा इशारा दिला; मात्र त्या दोन्ही चालकांनी वाहन न थांबवताच गाडी वळवून आरोसच्या दिशेने धूम ठोकली. पथकाने पाठलाग केला असता अरुंद पुलावर दारू वाहतूक करणाऱ्या दोन्ही गाड्यांचा ताबा सुटल्याने त्या चरात आढळून आल्या. पाहणी केली असता दोन्ही वाहनांच्या दर्शनी व मागील बाजूचे नुकसान झाले होते. पथकप्रमुखांनी तपासणी केली असता त्या दोन्ही गाड्यांमध्ये गोवा बनावटीच्या दारूचे बेकायदा खोके असल्याचे समोर आले. संशयितांनी अंधाराचा फायदा घेत पलायन केल्याचे राज्य उत्पादन शुल्क विभागाकडून सांगण्यात आले. ही कारवाई वरिष्ठांच्या मार्गदर्शनाखाली पथकप्रमुख रोकडे, प्रवीण माने, दुय्यय निरीक्षक विश्‍वजीत आभाळे, शिवाजी काळे, अविनाश पाटील, जवान ज्योतिबा पाटील, केतन वझे, अर्जुन कापडे, शाहरुख तडवी, सचिन पैठणकर, सुशील परब, शरद साळुंखे, चालक साजीद मुल्ला, वसंत घुंगरे, संदीप कदम यांनी केली. संपादन - राहुल पाटील Tajya news Feeds https://ift.tt/eA8V8J

via Tajya news Feeds https://ift.tt/39Zr7qg