सिंधुदुर्गात आयसोलेशनमधील चौघांचा मृत्यू ओरोस (सिंधुदुर्ग) - जिल्हा रुग्णालयातील आयसोलेशन कक्षात उपचार घेत असलेल्या चार व्यक्तींचा गेल्या 48 तासात मृत्यू झाला आहे. तर होम क्वारंटाईन असलेल्या एका महिलेचा मृत्यू झाला आहे. यांच्या मृत्यूशी कोरोना विषाणूचा काहीही संबंध नाही. तरीही या सर्वांचे नमुने मिरज येथे तपासणीसाठी पाठविले होते. त्यातील तीन व्यक्तींचे नमुने निगेटिव्ह आले आहेत. तर दोघांचे नमुने आलेले नाहीत, अशी माहिती जिल्हाधिकारी के. मंजूलक्ष्मी यांनी आज पत्रकारांना दिली. सिंधुदुर्ग जिल्ह्यात कोरोनाचा आतापर्यंत एकमेव पॉझिटिव्ह रुग्ण आढळला होता. त्याचाही दुसरा व तिसरा नमुना निगेटिव्ह आल्याने त्याला घरी सोडण्यात आले आहे. त्यानंतर जिल्ह्यात एकही व्यक्ती कोरोना बाधित आढळलेली नाही; मात्र गेल्या दोन दिवसात जिल्हा रुग्णालयातील आयसोलेशन कक्षात दाखल असलेल्या व्यक्तींच्या मृत्यूचे प्रमाण वाढले आहे. आयसोलेशनमधील तब्बल चार व्यक्ती मृत झाल्या आहेत. याबाबत जिल्हाधिकारी मंजूलक्ष्मी यांची भेट घेऊन विचारणा केली असता त्यांनी या सर्वांचा कोरोना विषाणूशी संबंध नाही. यातील 3 व्यक्ती वयस्कर होत्या. तसेच त्यांना अन्य आजार होते. त्यामुळे ते मृत झाले. तर एक तरुण व एक तरुणी अशा अन्य दोन व्यक्तींचा आयसोलेशनमध्ये उपचार घेताना मृत्यू झाला आहे. त्यांचाही कोरोनाशी सबंध नाही. हे दोन्ही तरुण गंभीर आजाराने ग्रासलेले होते. त्याच्यावर उपचार घेत असताना या दोघांचा बुधवारी मृत्यू झाला आहे. या सर्वांचे नमुने तपासणीसाठी पाठविण्यात आलेले आहेत. यातील तिघांचे नमुने निगेटिव्ह आलेले आहेत. उर्वरित दोघांचे नमूने शिल्लक आहेत; मात्र केवळ खात्री करण्यासाठी हे नमूने पाठविण्यात आले असून त्यांच्यात कोरोनाची कोणतीही लक्षणे नव्हती, असे यावेळी मंजूलक्ष्मी यांनी सांगितले. नव्याने 20 नमुने मिरज येथे रवाना जिल्हा सामान्य रुग्णालयातील आयसोलेशन कक्षामध्ये नव्याने 2 रुग्ण दाखल झाले असून सध्या 62 रुग्ण दाखल आहेत. गुरुवारी नव्याने 20 नमुने मिरज येथे तपासणीसाठी पाठविण्यात आले आहेत. त्यामुळे आतापर्यंत 228 नमुने तपासणीसाठी पाठविण्यात आले असून त्यापैकी 197 नमुन्यांचा अहवाल प्राप्त झाला आहे. बुधवारी प्रलंबित असलेल्या 33 नमुन्यांपैकी 22 नमुन्यांचा अहवाल प्राप्त झाले असून ते सर्व अहवाल निगेटिव्ह आले आहेत. आता 31 नमुन्यांचा अहवाल येणे बाकी आहे. सध्या जिल्ह्यात होम क्वारंटाईन करण्यात आलेल्या 271 व्यक्ती असून संस्थात्मक अलगीकरणामध्ये 67 व्यक्ती आहेत. बुधवारी होम क्वारंटाइन असलेल्या 152 व्यक्तींना सोडण्यात आले. तर संस्थात्मक क्वारंटाइनमध्ये नव्याने 7 व्यक्तींना दाखल करण्यात आले आहे. आरोग्य यंत्रणेमार्फत आज एकूण 2 हजार 277 व्यक्तींची तपासणी करण्यात आली आहे. जिल्ह्यातील निवारा केंद्रातील 264 व्यक्तींची तपासणी करून त्यांचे सामुपदेशन करण्यात आले आहे. मृत झालेल्यामध्ये वयस्कर व्यक्ती गेल्या दोन दिवसात आयसोलेशनमध्ये दाखल असलेल्या चार व्यक्तींचे निधन झाले आहे. यातील एक व्यक्ती 82 वयाची, दुसरी व्यक्ती 80 वयाची होती. या दोघांनाही गंभीर आजार होता. तर अन्य दोन मृतांमध्ये एक 35 वर्षाचा तरुण व एका 21 वर्षाच्या तरुणीचा समावेश होता; मात्र या दोन्ही गंभीर आजाराच्या होत्या. क्वारंटाइनमध्ये असताना मृत झालेली आचरा येथील महिला 72 वर्षीय होती. तिलाही गंभीर आजार होता. सध्या कोरोना असल्याने या आजाराशी संबंध नसलेली व्यक्ती असली तरी तिला आयसोलेशनमध्ये दाखल केले जाते, असे जिल्हा शल्यचिकित्सक डॉ. धनंजय चाकूर यांनी सांगितले. News Story Feeds https://ift.tt/eA8V8J

via News Story Feeds https://ift.tt/2KsWb3U