ग्रामपंचायत निवडणूक ; 70 वर्षांच्या आजी बिनविरोध चिपळूण - तालुक्‍यातील 83 ग्रामपंचायतींच्या निवडणुकीसाठी एकूण 1 हजार 224 उमेदवारी अर्ज दाखल झाले होते. आज झालेल्या छाननीत एकूण 9 अर्ज बाद झाले. पिलवलीतर्फे वेळंब येथील 7 जागांसाठी केवळ 2 अर्ज आले असून, त्यात एका 70 वर्षीय महिलेचा समावेश आहे. त्या बिनविरोध निवडून आल्या. विजया सुदाम गमरे असे या आजींचे नाव आहे. रामपूर येथे पंचायत समितीचे माजी सभापती जितेंद्र चव्हाण सदस्य पदासाठी शड्डू ठोकून निवडणुकीच्या आखाड्यात उतरले आहेत. तालुक्‍यातील पिलवलीतर्फे वेळंब येथे 7 जागांसाठी निवडणूक जाहीर झाली होती, मात्र येथे केवळ दोनच अर्ज दाखल झाले असून, ते वैध ठरले आहेत. या गावात माहिती अर्जाद्वारे तक्रारी नसतात. राजकारणदेखील फारसे रंगले नव्हते, तरीही उमेदवारीसाठी कोणी इच्छुक नसल्याने ही परिस्थिती निर्माण झाली आहे. वेळंब ग्रामपंचायतीच्या प्रभाग दोनमध्ये दोन जागा आहेत. त्या दोन्ही जागा वाडीने बिनविरोध करण्याचा निर्णय झाला होता. त्याप्रमाणे दोघांना अर्ज दाखल केले. त्यापैकी एक 70 वर्षांच्या आजीबाई आहेत. तालुक्‍यातील आकले, अनारी, निरबाडे, तोंडली, निवळी, वडेरू (2), आगवे असे 8 अर्ज छाननीत अवैध ठरले आहेत. या उमेदवाराच्या अर्जात कागदपत्राच्या त्रुटी राहिल्याने ते बाद झाले, तर रिक्‍टोली येथे एका उमेदवाराने तीन अपत्य असतानाही उमेदवारी अर्ज दाखल केला होता. त्यावर आक्षेप आल्यानंतर त्याचाही अर्ज अवैध ठरवला. त्यामुळे 83 ग्रामपंचायतींच्या निवडणुकीत 1213 अर्ज वैध ठरले आहेत. दुसरीकडे रामपूर येथील पंचायत समितीचे माजी सभापती जितेंद्र ऊर्फ पप्या चव्हाण हेदेखील रामपूर ग्रामपंचायत निवडणुकीच्या आखाड्यात उतरले आहेत. चव्हाण यांनी प्रभाग एकमधून उमेदवारी अर्ज दाखल केला आहे. त्यामुळे रामपूरच्या निवडणुकीकडे विशेष लक्ष आहे. संपादन - धनाजी सुर्वे News Story Feeds https://ift.tt/eA8V8J

via News Story Feeds https://ift.tt/2WX7dos