बांदा उड्डाणपुल हालचालींना वेग बांदा (सिंधुदुर्ग) - मुंबई-गोवा महामार्गावर बांदा शहरात मंजूर झालेल्या उड्डाणपूलाचा अंतिम आराखडा मंजूर करण्यासाठी वरिष्ठ पातळीवरून तत्काळ प्रस्ताव पाठविण्याचे आदेश दिल्याने आज सायंकाळी उशिरा राष्ट्रीय महामार्ग विभागाचे उपअभियंता आय. एस. मणेर यांनी बांद्यात येत महामार्गाची उपोषणकर्ते संजय आईर यांच्यासह पाहणी केली. आज रात्रीच 600 मीटर लांबीच्या उड्डाणपुलाचा प्रस्ताव तयार करून वरिष्ठ कार्यालयाला मंजुरीस पाठविणार असल्याचे मणेर यांनी सांगितले. यावेळी येथील वर्दळीचा विचार करता योग्य पद्धतीने उड्डाणपूल उभारावा, अशी मागणी सामाजिक कार्यकर्ते संजय आईर यांनी केली. "बांद्यात उड्डाणपूल मंजूर' या मथळ्याखाली "सकाळ'ने 21 ऑक्‍टोबरला सर्वप्रथम वृत्त प्रसिद्ध केले होते. या उड्डाणपुलासाठी वाफोली येथील सामाजिक कार्यकर्ते संजय आईर यांनी 26 जानेवारी 2019ला उपोषण करून शासनाचे लक्ष वेधले होते. त्यावेळी तत्कालीन उपअभियंता प्रकाश शेडेकर यांनी भेट घेत उड्डाणपूल होण्यासाठी प्रस्ताव पाठविण्याचे आश्‍वासन दिले होते. तब्बल दीड वर्षे आईर यांनी उड्डाणपूल होण्यासाठी केंद्र शासनापर्यंत सातत्याने पाठपुरावा केला. आठ दिवसांपूर्वीच राष्ट्रीय महामार्ग विभागाचे अधीक्षक अभियंता यांनी बांदा येथे उड्डाणपूल मंजूर केले असून याचे रेखाचित्र व अंदाजपत्रक तयार करून अंतिम प्रस्ताव सादर करण्याचे लेखी आदेश रत्नागिरी कार्यालयाचे कार्यकारी अभियंता यांना दिले होते. आईर यांनी पुन्हा पाठपुरावा सुरू केल्याने उड्डाणपुलाचे रेखाचित्र तयार करून वरिष्ठ कार्यालयाला पाठविण्याचे आदेश दिल्याने सायंकाळी उशिरा उपअभियंता मणेर, सहाय्यक अभियंता आर. के. काळे, कनिष्ठ अभियंता गणेश महाजन यांनी तातडीने येत महामार्गाची पाहणी केली. यावेळी सामाजिक कार्यकर्ते संजय आईर, मोहसीन खान उपस्थित होते. अंतिम मंजुरीनंतर काम उपअभियंता मणेर यांनी सांगितले, की बसस्थानकापासून उड्डाणपुलाला प्रारंभ होणार आहे. याठिकाणी असलेल्या बॉक्‍ससेलची उंची वाढविण्यात येणार आहे. कट्टा कॉर्नर चौकात 6 रस्ते एकत्रित येत असल्याने याठिकाणी दुपरी बॉक्‍सेल ठेवण्यात येणार आहे. एकूण 600 मीटर लांबीच्या उड्डाणपूलाचा आराखडा व रेखाचित्र तयार करण्यात येणार आहे. वरिष्ठ कार्यालयातून आदेश दिल्याने आज रात्रीच अंतिम प्रस्ताव तयार करून वरिष्ठ कार्यालयाला पाठविण्यात येणार आहे. अंतिम मंजुरी मिळाल्यानंतर कामास सुरुवात होणार असल्याचे मणेर यांनी स्पष्ट केले. संपादन - राहुल पाटील News Story Feeds https://ift.tt/eA8V8J

via News Story Feeds https://ift.tt/3ej40aJ