मायलॅबच्या अँटीजन किटला आयसीएमआरची परवानगी; 450 रुपयांत होणार कोरोनाची चाचणी पुणे - "मायलॅब'च्या अँटीजन किटला "भारतीय वैद्यक संशोधन परिषदे'ने (आयसीएमआर) उत्पादनाची परवानगी दिली आहे. भारतात विकसित केलेले हे पहिले अँटीजन कोरोना टेस्टींग किट आहे. विशेष म्हणजे हे कीट 450 रुपयांत उपलब्ध होणार आहे. आरटी-पीसीआर तंत्रज्ञानाने कोरोनाचे निदान करणारे पहिली स्वदेशी किटही मायलॅबने विकसित केले आहे. देशातील जलद कोरोना चाचण्यांना चालना देण्यासाठी उपयुक्त असलेल्या या किटचे नाव "पॅथोकॅच कोविड-19 अँटीजन रॅपिड टेस्टिंग किट' असे आहे. मायलॅब डिस्कव्हरी सोल्युशनचे व्यवस्थापकीय संचालक हसमुख रावल म्हणाले, ""तंत्रज्ञानाच्या जोरावर कोरोनाचा मुकाबला करण्यासाठी मायलॅब सर्वतोपरी प्रयत्न करत आहे. आरटी-पीसीआर तंत्राचा वापर करून विकसित केलेल्या आमच्या पहिल्या स्वदेशी किटमुळे परदेशावरील अवलंबित्व तर कमी झाले. पण त्याचबरोबर आमचा आत्मविश्वासही वाढला गेला.'' किटचे उत्पादन सुरू झाले असून ती ऑर्डर केल्यानंतर लगेच उपलब्ध करून दिली जाणार असल्याचे कंपनीच्या वतीने सांगण्यात आले आहे. जलद चाचण्यांचे महत्त्व - - देशात अँटीजेन आणि आरटी-पीसीआर अशा दोनही चाचण्यांची आवश्‍यकता - अँटीजेन टेस्टमध्ये बाधित आढळल्यास त्यांची परत चाचणी करण्याची गरज नाही. - बाधित नसलेल्यांची पुन्हा आरटी-पीसीआरने चाचणी करण्यात येईल. - यामुळे वेळ तर वाचेल पण त्याचबरोबर पैसेही वाचतील - विलगीकरण, कॉंटॅक्‍ट ट्रेसिंग जलद करणे शक्‍य होणार कोरोनाचा समर्थपणे मुकाबला करण्यासाठी जलद आणि आक्रमक पद्धतीने निदान करणे गरजेचे आहे. उच्च दर्जाचे स्वदेशी निदान तंत्रज्ञान उपलब्ध करून देण्यासाठी मायलॅब कटिबद्ध आहे. भागीदारी करणाऱ्या आमच्या सहकाऱ्यांबरोबरच सरकारी संशोधन संस्थांच्या पाठिंब्यामुळेच हे शक्‍य झाले आहे. - डॉ. सुजित जैन, संचालक, मायलॅब. अँटिजेन म्हणजे काय? विषाणूंच्या संसर्गाने रुग्णाच्या शरीरात विषाणूजन्य प्रथिने (अँटिजेन) तयार होतात. रुग्णाच्या श्‍वसनमार्गातील नमुने घेतल्यानंतर हे अँटिजेन आहेत की नाही, याची माहिती या पद्धतीतून मिळते. अर्थात, यासाठी विषाणूंचा संसर्ग कधी झाला, त्याचे नमुने कसे घेतले यावर या टेस्टचे निदान अवलंबून रहाते. News Story Feeds https://ift.tt/eA8V8J

via News Story Feeds https://ift.tt/2WNm6dd