सिंधुदुर्गवासीयांसाठी आनंदाची बातमी सिंधुदुर्गनरी (सिंधुदुर्ग) - कोरोनाच्या प्रवाहाखाली जिल्हा असताना सत्ताधारी व विरोधक यांच्यात "ग्रीन जिल्हा' या विषयावरुन राजकारण सुरू आहे; मात्र वस्तुतः जिल्ह्याची वाटचाल अधिकृतपणे ग्रीन झोनच्या दिशेने सुरू आहे. कारण जिल्ह्यात एकमेव आढळलेल्या रुग्णाची नमुना चाचणी मिळून 30 दिवस उलटले आहेत. त्याची दुसरी व तिसरी चाचणी निगेटिव्ह येऊन 28 दिवस होण्यासाठी केवळ 5 दिवस शिल्लक राहिले आहेत. या कालावधीत कोरोनाचा एकही रुग्ण पॉझिटिव्ह आढळला नाहीतर केंद्राच्या निर्देशानुसार जिल्हा आपोआप ग्रीन झोनमध्ये जाणार आहे. कोरोना विषाणूने पूर्ण जगाला वेठीस धरत दहशतीखाली ठेवले आहे. राज्यात कोरोनाचे देशात सर्वात जास्त रुग्ण असून यामुळे मृत्यू होणाऱ्यांची संख्याही जास्त आहे. त्यामुळे राज्य सरकारने राज्यात रेड, ऑरेंज व ग्रीन असे तीन झोन जाहीर केले आहेत. ज्या जिल्ह्यात एकही कोरोना रुग्ण मिळाला नाही तो ग्रीन जिल्हा. एक ते 15 रुग्ण मिळालेला जिल्हा ऑरेंज. त्यापेक्षा जास्त रुग्ण असलेला जिल्हा रेड जिल्हा म्हणून जाहीर केला आहे. सिंधुदुर्ग जिल्ह्यात एक रुग्ण आढळला असल्याने ऑरेंजमध्ये समावेश केला आहे. जिल्ह्यात कोरोना विषाणू नियंत्रणात आहे, असे म्हटले तर वावगे ठरणार नाही. देशात कोरोना येऊन 6 आठवडे उलटले असून 7 वा आठवडा सुरू होणार आहे. या सहा आठवड्यात सिंधुदुर्ग जिल्ह्यात एकच कोरोना पॉझिटिव्ह रुग्ण आढळला आहे. आतापर्यंत जिल्ह्यातून कोरोना तपासणीसाठी सुरुवातीला पुणे व नंतर मिरज येथे मिळून 228 नमुने पाठविले आहेत. यातील 19 नमुने अहवाल आलेले नाहीत. 209 नमुन्यांचे अहवाल आलेले आहेत. यातील एक अहवाल पॉझिटिव्ह आला आहे. तर 208 नमुने निगेटिव्ह आलेले आहेत. होम आणि संस्थात्मक क्‍वारंटाइन केलेल्यांची आतापर्यंतची संख्या 500 ते 600 च्या आसपास आहे. आयसोलेशनची संख्या 70 च्या आसपास राहिली आहे. सध्या 62 रुग्ण आयसोलेशनमध्ये उपचार घेत आहेत. केंद्राच्या निर्देशानुसार ताप असलेले सर्वच रुग्ण आयसोलेट केले जात असल्याने ही संख्या वाढलेली दिसते. केंद्राच्या आणि जागतिक आरोग्य संघटनेच्या निर्देशानुसार शेवटचा आढळलेल्या कोरोना पॉझिटिव्ह रुग्णाची तिसरी टेस्ट निगेटिव्ह आल्यानंतर पुढील 28 दिवसांत ज्या जिल्ह्यात एकही कोरोना पॉझिटिव्ह रुग्ण आढळला नाहीतर तो जिल्हा आपोआप ग्रीन झोनमध्ये जातो. सिंधुदुर्ग जिल्ह्यात आतापर्यंत एकमेव कोरोना पॉझिटिव्ह रुग्ण आढळला आहे. 26 मार्चला हे निदान झाले होते. हा रुग्ण आढळून 23 एप्रिलला 28 दिवस पूर्ण झाले असून आता 30 दिवस झाले आहेत. तर या रुग्णाची दुसरी व तिसरी टेस्ट 3 एप्रिलला निगेटिव्ह आली होती. 9 एप्रिलला त्याला घरी सोडले. त्यामुळे जिल्हा कोरोनामुक्त झाला होता. ही निगेटिव्ह टेस्ट आल्यापासून 23 दिवस उलटले आहेत. या 23 दिवसांत एकही कोरोना पॉझिटिव्ह रुग्ण आढळलेला नाही. शासन निर्देशानुसार 28 दिवस पूर्ण होण्यासाठी अजून पाच दिवसांचा कालावधी शिल्लक आहे. त्यामुळे या पाच दिवसांत कोरोना रुग्ण जिल्ह्यात आढळला नाहीतर जिल्हा आपोआप ग्रीन झोनमध्ये जाणार आहे. तसे झाल्यास विरोधक ग्रीन झोनची करीत असलेली मागणी आपोआप मान्य होणार आहे. क्‍वारंटाइनची वाढती संख्या चिंतेचे कारण सिंधुदुर्गात 26 मार्चला एकमेव कोरोना रुग्ण आढळला. त्यानंतर सुदैवाने एकही रुग्ण मिळालेला नाही, ही दिलासादायक बाब असली तरी दिवसागणिक वाढत जाणाऱ्या क्‍वारंटाइन संख्या जिल्ह्याला सतावतेय. जिल्ह्याची वाटचाल अधिकृत ग्रीन झोनकडे होत असताना क्‍वारंटाइन संख्या वाढत आहेत. 300 ते 500 च्या मध्ये ही आकडेवारी सध्या राहत आहे. यामागे परजिल्ह्यातून येणाऱ्या नागरिकांची संख्या आहे. बाहेरील जिल्ह्यातून येणाऱ्या व्यक्तींना आता 28 दिवसांचे संस्थात्मक क्‍वारंटाइन करण्याचा निर्णय प्रशासनाने घेतला आहे. येणाऱ्यांची संख्या जास्त आहे. हाच ग्रीन झोनच्या मार्गातील अडथळा ठरू शकतो, असे प्रशासनाचे म्हणणे आहे. क्‍वारंटाइन संख्या 200 च्या आत राहणे आवश्‍यक आहे. रेड, ऑरेंज किंवा ग्रीन झोन हे केवळ कोरोनाच्या पार्श्‍वभूमीवर तयार केले आहेत. एखादा जिल्हा रेड झोनमध्ये आहे आणि दुसरा जिल्हा ग्रीन झोनमध्ये आहे. या दोन्ही जिल्ह्यांत लॉकडाऊनच्या पार्श्‍वभूमीवर काहीही वेगळे निकष नाहीत. केंद्राने आदेशात तसे काही नमूद केलेले नाही. केवळ ग्रीन झोनमध्ये समावेश झाल्यावर कोरोनाचा धोका नाही किंवा कमी झाला, एवढे समाधान मिळणार आहे; मात्र ग्रीन झोनमुळे सर्वच पूर्वीप्रमाणे सुरळीत सुरु होईल, असे नाही. - के. मंजूलक्ष्मी जिल्हाधिकारी, सिंधुदुर्ग News Story Feeds https://ift.tt/eA8V8J

via News Story Feeds https://ift.tt/2VEFRDL