फुकटात विमानप्रवास करायचा आहे, तर `या` महापालिकेत या सोलापूर : तुम्हाला विमानप्रवास करायचा आहे... तोही शासकीय खर्चाने... तर मग सोलापूर महापालिकेत ड्रायव्हर म्हणून नोकरीला लागा. एखाद्या सभापतीच्या, विशेषतः महिला व बालकल्याण समितीच्या वाहनावर तुमची नेमणूक झाली तर तुमचा विमानप्रवास नक्की समजा. हा विनोद किंवा उपरोधिक वक्तव्य नाही, तर आर्थिकदृष्ट्या डबघाईला आलेल्या सोलापूर महापालिकेने ते प्रत्यक्षात आणले आहे. आहे की नाही आश्‍चर्य! आधी हे वाचा - नगरसेविकेच्या नावावर युवकाचा प्रवास सोलापूर महापालिकेतील महिला व बालकल्याण समितीच्या वतीने नुकताच देशातील विविध शहरांमध्ये अभ्यासदौरा करण्यात आला होता. या दौऱ्यात नगरसेविका तर होत्याच, शिवाय काहींचे पती, काहींचे मुलं तर काहींनी आपल्या भावांना दौऱ्यावर पाठविल्याची चर्चा आहे. शासकीय दौऱ्यात नगरसेविका व अधिकाऱ्यांच्या समावेशाला हरकत नाही. मात्र ज्यांचा महापालिकेशी काही संबंध नाही अशांचीही नावे दौऱ्याच्या अधिकृत यादीत आहेत आणि हे फक्त सोलापूर महापालिकेतच घडू शकते, हे विद्यमान पदाधिकाऱ्यांनी दाखवून दिले आहे. हेही वाचा - कोरोना ः या महापालिकेत प्रवेशबंदी अभ्यास दौऱ्यासाठी तब्बल 43 जण गेले होते. त्यामध्ये सभापतीच्या वाहन चालकाचाही समावेश होता. नगरसेविकांच्या अभ्यास दौऱ्यात वाहन चालकाला घेऊन जाता येते का? हा प्रश्‍न आता उपस्थित होऊ लागला आहे. वाहन चालकाबरोबरच शिपाई असलेल्या महिला कर्मचाऱ्यांनाही नेण्यात आले होते. याशिवाय, ज्यांचा थेट महापालिकेशी संबंध नाही अशांचाही त्यात समावेश होता. संतापजनक बाब अशी, शिपायांना दौऱ्यावर का नेले अशी विचारणा केली असता, नगरसेविकांच्या बॅगा उचलण्यासाठी कोणीतरी असावे, म्हणून त्यांना घेऊन जाण्याचे नियोजन केल्याचे उत्तर बेधडकपणे देण्यात आले. त्यामुळे या शिपाई कर्मचाऱ्यांची नियुक्ती महापालिकेतील कामासाठी आहे की, नगरसेवकांच्या बॅगा उचलण्यासाठी, असा प्रश्‍नही उपस्थित होत आहे. एकंदरीतच शासकीय खर्चाने विमान, रेल्वेचा प्रवास, पंचतारांकित हॉटेलमध्ये निवास, भोजनावळ्या करायच्या असतील तर सोलापूर महापालिका ही नोकरीचे उत्तम केंद्र आहे, असे म्हटल्यास वावगे ठरणार नाही. News Story Feeds https://ift.tt/eA8V8J

via News Story Feeds https://ift.tt/33ytLhZ