आणखी 14 जण होम क्‍वारंटाईन कणकवली (सिंधुदुर्ग) - सिंधुदुर्गात पहिला कोरोना पॉझिटिव्ह मिळालेल्या नडगिवे गावातील त्या रुग्णाच्या सान्निध्यात आलेल्या आणखी 14 लोकांना होम क्‍वारंटाईन करण्यात आलेले आहे. थेट संपर्कात असलेल्या दहा लोकांपैकी नऊ जणांची आरोग्य तपासणी जिल्हा रुग्णालयात करण्यात आलेली आहे. ही माहिती कणकवली तालुका वैद्यकीय अधिकारी डॉ. संजय पोळ यांनी दिली. तालुक्‍यातील नडगिवे गावच्या सात किलोमीटरच्या परिसरातील गावांमध्ये आरोग्य तपासणी आणि सर्वेक्षण मोहीम यशस्वीरीत्या पूर्ण झालेली आहे. चार दिवसांपूर्वी या परिसरातील एक व्यक्ती कोरोनाची लागण झाल्याचे स्पष्ट झाले होते. त्या दिवसापासून या परिसरात कंटाईनमेंट व बफर झोन तयार करून जनतेच्या आरोग्याची काळजी घेतली जात आहे. त्यासाठी चार डॉक्‍टरांची दोन वैद्यकीय पथके तैनात करण्यात आलेली आहेत. संबंधित रुग्ण कोरोना पॉझिटिव्ह मिळाल्यानंतर सर्वत्र भीतीचे वातावरण निर्माण झाले होते. त्याही स्थितीवर आरोग्य यंत्रणेने नियंत्रण मिळविले. आरोग्य यंत्रणेने खारेपाटण परिसरात कंटाईनमेंट व बफर झोन तयार करून प्रत्येकाची आरोग्य तपासणी सुरू केली. त्यासाठी 19 कर्मचारी आणि दोन वैद्यकीय पथकांची नियुक्ती केली. महसूल, जिल्हा प्रशासन, स्थानिक ग्रामपंचायत प्रशासन, लोकप्रतिनिधी यांची समिती स्थापन करून त्यांच्या मदतीने घराघरापर्यंत पोचण्याचे उद्दिष्ट पूर्ण केले आहे. सद्यःस्थितीत नडगिवे, खारेपाटण परिसरात आरोग्य विभागाने सर्व आरोग्यसेवा दिली असून, ज्या गावात कोरोना पॉझिटिव्ह रुग्ण मिळाला. त्या नडगिवे उपकेंद्रात दोन डॉक्‍टरांचे स्वतंत्र आरोग्य पथक नियुक्त केलेले आहे. डॉ. प्रणिती इंगवले यांच्या नेतृत्वाखाली ही दोन्ही आरोग्यकेंद्र काम करत आहेत. या परिसरातील कोणत्याही व्यक्तीला ताप, खोकला, सर्दी अशा आजारांची लक्षणे दिसल्यावर खारेपाटण प्राथमिक आरोग्यकेंद्र, तसेच नडगिवे गावातील लोकांनी तेथील उपकेंद्रात जाऊन आरोग्य पथकाकडून तपासणी करून घ्यावी, असे आवाहन तालुका वैद्यकीय अधिकारी डॉ. संजय पोळ यांनी केले आहे. कोरोना पॉझिटिव्ह व्यक्‍तीशी 10 व्यक्‍ती थेट संपर्कात आल्या होत्या. यातील एक जण आरोग्य तपासणी करून घेण्यास नकार देत असल्याने त्याची तक्रार स्थानिक समितीकडे करण्यात आली असल्याचेही ते म्हणाले. News Story Feeds https://ift.tt/eA8V8J

via News Story Feeds https://ift.tt/2JsP6jC