हातचलाखी करून पळविले रुपेय 1.50 लाख निपाणी : एटीएममधून रक्कम काढून देण्याच्या बहाण्याने भामट्याने कार्ड बदलून कागल येथील नामांकित व्यक्तीला दीड लाखाला गंडा घातल्याची घटना आज उघडकीस आली. भामट्याने स्वतःचे एटीएम कार्ड संबंधित व्यक्तीला देऊन निपाणी आणि कागल येथे रक्कम काढली. कागल येथील गणपती माळवी यांना हा फटका बसला आहे. कागल येथील निवृत्त लिपिक गणपती माळवी यांनी मंगळवारी (ता. 3) कागल येथील एटीएम केंद्रावर रक्कम काढण्याचा प्रयत्न केला. भामट्याने "आपण रक्कम काढून देतो,' असे सांगून एटीएमचा पासवर्ड घेत हातचलाखीने स्वतःचे कार्ड माळवी यांना देऊन त्यांचे कार्ड घेऊन पळ काढला. आज सकाळी माळवी यांच्या खात्यातून तब्बल दीड लाख रुपये काढल्याचे संदेश आले. त्यांनी कागल पोलिसांत फिर्याद दिली. त्यानुसार कॉन्स्टेबल विजय पाटील व संदेश पोवार यांनी माहिती घेतली असता निपाणी येथून भामट्याने रक्कम काढल्याचे स्पष्ट झाले. त्यामुळे बुधवारी रात्री निपाणी येथे माळवी यांच्यासह परिसरातील सीसीटीव्ही तपासणी केली. त्या वेळी संबंधित भामटा व त्याच्या समवेत तिघे आढळले. त्यापैकी निपाणी येथे दुचाकीवरून दोन भामटे व तिसरा एक जण आल्याचे स्पष्ट झाले आहे. निपाणीमध्ये चारवेळा त्यांनी प्रत्येकी दहा हजारांप्रमाणे 40 हजार काढले. त्यानंतर शहरातील एका ज्वेलर्समध्ये जाऊन सोने खरेदी केली आहे. दुकानाची चौकशी केली असता तेथील सीसीटीव्ही बंद असल्याचे निदर्शनास आले आहे. आज पुन्हा तपासणी उद्या (ता. 5) सकाळी संबंधित एटीएममधील बॅंकेमध्ये सीसीटीव्ही फुटेज तपासण्यासाठी हे पथक पुन्हा निपाणी येथे येणार आहे. दिवाळीच्या पार्श्वभूमीवर घडलेल्या घटनेमुळे निपाणी आणि परिसरातून भीती व्यक्त होत आहे. संपादन ः रंगराव हिर्डेकर News Story Feeds https://ift.tt/eA8V8J - Click Live News Short news on Mobile 2019.....