सावंतवाडी अपघातात तरुण गंभीर सावंतवाडी (सिंधुदुर्ग) - मोटार आणि दुचाकी यांच्यात समोरासमोर झालेल्या धडकेत दुचाकीस्वार तरूण गंभीर जखमी झाला. ज्ञानेश्‍वर कृष्णा परब (35, रा. बावळाट), असे त्याचे नाव आहे. हा अपघात आज सायंकाळी साडेपाचच्या सुमारास श्री देव उपरलकर देवस्थान परिसरात घडला. गेले काही दिवस अपघातांची मालिका तालुक्‍यात सुरू असून आज पुन्हा शहरापासून जवळच असलेल्या श्री देव उपरलकर देवस्थानजवळ दुचाकी आणि मोटारीमध्ये अपघात घडला. यात दुचाकीस्वार असलेला ज्ञानेश्‍वर परब याला गंभीर दुखापत झाल्याने प्राथमिक उपचारासाठी येथील उपजिल्हा रुग्णालयात दाखल केले आहे. अपघातामधील दुचाकीस्वार हा दाणोलीच्या दिशेने जात होता तर मोटार चालक गोव्याच्या दिशेने जात होता. ते श्री देव उपरलकर देवस्थान जवळ आले असता दोन्ही वाहनांची समोरासमोर धडक झाली. यामध्ये दुचाकीचे आणि मोटारीचे मोठे नुकसान झाले. अपघातानंतर घटनास्थळी नागरिकांनी गर्दी केली होती. यावेळी बेळगाव-सावंतवाडी मार्गावरील वाहतूक खोळंबली होती. पोलिसांचे आवाहन घटनेची माहिती मिळताच वाहतूक पोलिस प्रवीण सापळे, सखाराम भोई, सहायक पोलिस उपनिरीक्षक शरद लोहकरे आदींनी घटनास्थळी धाव घेत वाहतूक सुरळीत केली आणि अपघाताचा पंचनामा केला. एकीकडे ग्रामीण भागातील रस्त्यांची दुर्दशा झाली आहे तर दुसरीकडे भरधाव वेगाने वाहने हाकण्याच्या नादात अपघातांची मालिका सुरूच आहे. वाहने हाकताना काळजी घ्या, असे आवाहन वाहतूक पोलिसांनी करण्यात येत आहे. संपादन - राहुल पाटील News Story Feeds https://ift.tt/eA8V8J

via News Story Feeds https://ift.tt/34JFsmK