माजगावच्या प्रस्तावित धरणासाठी हालचाली सावंतवाडी (सिंधुदुर्ग) - माजगाव येथे प्रस्तावित असलेल्या शासनाच्या जलसंधारण व स्थानिक लघु पाटबंधारे विभागाच्या धरण प्रकल्पाबाबत पुन्हा एकदा हालचाली सुरू झाल्या आहेत. आज तेथील जमीन धारकांची प्रकल्प अधिकाऱ्यांसोबत महत्वाची बैठक पार पडली. यावेळी जमिनीचा मोबदला द्या व काम सुरू करा, अशी एकमुखी मागणी करण्यात आली. येत्या आठ दिवसात यासंदर्भात कार्यवाही होणार असल्याचे आश्‍वासन संबधित अधिकाऱ्यांनी दिल्याने येथील शेतकऱ्यांच्या आशा पल्लवित झाल्या आहेत. माजगाव महादेव मंदिर परिसरामध्ये 2009 मध्ये या लघु धरण प्रकल्पाला केंद्राकडून मंजुरी देण्यात आली आहे. जवळपास अकरा हेक्‍टर जमिनीमध्ये होणारा या प्रकल्पाचे काम आजमितीपर्यंत रखडले गेले आहे. या धरण प्रकल्पामध्ये येणाऱ्या जमिनीत वनविभागाची जमीन येत असल्याने वनविभागाच्या अटी शर्तीनुसार आवश्‍यक बाबींची पूर्तता होत नसल्याने माजगाव येथील शेतकऱ्यांना धरण प्रकल्पाची प्रतीक्षा करावी लागली आहे. दुसरीकडे ज्या शेतकऱ्यांची जमीन या धरण प्रकल्पामध्ये जाणार आहे, त्या शेतकऱ्यांना जमिनीचा मोबदला देण्याबाबत अद्यापही कोणतीही कार्यवाही संबंधित विभागाकडून होत नसल्याने धरण प्रकल्प उभारण्याबाबत हालचाली थंडावल्या होत्या; मात्र जलसंधारण विभागाकडून पुन्हा एकदा यासंदर्भात हालचाली सुरू झाल्या आहेत. आज लघुपाटबंधारे विभागाच्या आंबडपाल येथील अधिकाऱ्यांकडून गावातील प्रमुख व्यक्ती तसेच संबंधित जमीन मालकासोबत महत्वाची बैठक महादेव मंदिर येथे पार पडली. या बैठकीला गावचे प्रमुख आर. के. सावंत, पंचायत समिती सदस्य श्रीकृष्ण ऊर्फ बाबू सावंत, सरपंच दिनेश सावंत, उपसरपंच संजय कानसे, ऍड. श्‍याम सावंत व जमीनधारक उपस्थित होते. यावेळी झालेल्या चर्चेत शेतकऱ्यांनी हा प्रकल्प उभारण्यास आमचा कोणताही विरोध नसुन आजच्या जमीन भावाप्रमाणे आम्हाला शासनाकडून जमिनीचा मोबदला देण्याची मागणी केली. प्रकल्पाबाबत आशा जोपर्यंत हा मोबदला मिळत नाही तोपर्यंत आम्ही काम करायला देणार नाही. मोबदला द्या आणि काम सुरु करा, अशी एकमुखी मागणी त्यांनी केली. यावेळी संबंधित अधिकाऱ्यांनी शेतकऱ्यांना त्यांचा मोबदला देण्याबाबत येत्या आठ दिवसात कार्यवाही करण्यात येणार आहे, असे आश्‍वासन दिले. त्यामुळे पुन्हा एकदा रखडलेला धरण प्रकल्प होण्याच्या आशा पल्लवित झाल्या आहेत. संपादन - राहुल पाटील News Story Feeds https://ift.tt/eA8V8J - Click Live News Short news on Mobile 2019.....