सरकारी बाबू निवांत, सामान्य हैराण देवगड (सिंधुदुर्ग) - आघाडी शासनाने कार्यालयीन कामाच्या वेळा वाढवून पाच दिवसांचा आठवडा केला; परंतु तो जनतेच्या की कर्मचाऱ्यांच्या फायद्याचा? असा प्रश्‍न आता सर्वसामान्यांना पडला आहे. कामाच्या वेळा वाढवल्या तरीही विविध आस्थापनांमधील काही कर्मचारी वेळेत उपस्थित होत नसल्याने कामांचा खोळंबा होत आहे. त्यामुळे नागरिकांमध्ये प्रचंड अस्वस्थतता आहे. कोरोनामुळे बायोमेट्रीक प्रणालीची अंमलबजावणी काटेकोरपणे केली जावू नये, असे शासनाकडून निर्देश असल्याने कार्यालयातील वरिष्ठ अधिकारीही हतबल असल्याचे सार्वत्रिक चित्र आहे. पाच दिवसांचा आठवडा करण्याच्या मागणीला सत्तेवर आलेल्या आघाडी सरकारने हिरवा कंदील दाखवला. त्यामुळे पुर्वी दुसऱ्या आणि चौथ्या शनिवारी बंद असलेली शासकीय कार्यालये आता प्रत्येक शनिवारी बंद असतात. पुर्वी शासकीय कामाची वेळ सकाळी 10 ते सायंकाळी पावणे सहा अशी होती. तर आता वेळ वाढवून सकाळी पावणे दहा ते सायंकाळी सव्वासहा अशी करण्यात आली. त्यामध्ये दुपारी अर्धातास जेवणाची विश्रांती. त्यात चतुर्थश्रेणी कर्मचाऱ्यांना सकाळी पंधरा मिनिटे अगोदर आणि सायंकाळी पंधरा मिनिटे नंतर अशी अर्धातास वेळ अधिक आहे; परंतु कार्यालयाच्या वेळा बदलूनही काही कर्मचारी वेळेत येत नसल्याने अनेकांना कामासाठी तिष्ठत थांबावे लागत असल्याचे चित्र आहे. सध्या दक्षिणायण सुरू असल्याने दिवस लहान होत चालला आहे. अशावेळी सायंकाळी लवकर काळोख पडतो. त्यामुळे कार्यालयाची वेळ अधिक असली तरीही उशिरापर्यंत कोणी थांबत नसल्याचे दिसते. कर्मचाऱ्यांच्या वेळा पाळण्यासाठी कार्यालयात बायोमेट्रीक हजेरी प्रणाली असली तरीही त्यामध्ये सध्या कोरोनाचा अडसर आहे. पाच दिवसांच्या आठवडा झाला आणि कोरोनाचे आगमन झाले. त्यामुळे या स्थितीचा गैरफायदा अनेक महाभाग घेत असल्याचे दिसते. कोरोनामुळे अजूनही कर्मचाऱ्यांच्या शंभर टक्‍के उपस्थितीबाबत शासनाचे स्पष्ट निर्देश नाहीत. त्यामुळे 100 टक्‍के उपस्थितीबाबत आग्रह धरता येत नाही. शासनाकडून आदेश प्राप्त झाल्यावर उपस्थितीबाबत कडक अंमलबजावणी करणे सोपे जाईल. - जयप्रकाश परब, गटविकास अधिकारी, पंचायत समिती देवगड संपादन - राहुल पाटील News Story Feeds https://ift.tt/eA8V8J - Click Live News Short news on Mobile 2019.....