सावंतवाडीतील बहुचर्चित मल्टिस्पेशालिटीसाठी आता अशी हालचाल सावंतवाडी (सिंधुदुर्ग) - येथील बहुचर्चित मल्टिस्पेशालिटी रुग्णालयासाठीची जागा बदलण्याच्या हालचाली सुरू झाल्या आहेत. याआधी भूमिपूजन झालेली जागा न्यायप्रविष्ठ असल्याने पर्यायी जागेचा शोध सुरू झाला आहे. आज शहरातील पोलिस परेड ग्राऊंड शेजारील सरकारी जागेची या रुग्णालयासाठी पर्याय म्हणून खासदार विनायक राऊत यांनी पाहणी केली. तहसीलदार राजाराम म्हात्रे यांनी शासकीय जागा दाखविली. या वेळी बांधकाम कार्यकारी अभियंता युवराज देसाई यांना ही जागा निश्‍चित करण्यासाठी पुढील सोपस्कार करा, असे निर्देश राऊत यांनी दिले. न्यायालयीन अडथळा असल्याने शासनाच्या मालकीच्या नव्या जागेची पाहणी खासदार राऊत यांनी केली. या जागेची कागदपत्रे लवकरात लवकर आरोग्य विभागाला सादर करा, अशी सूचनाही तहसीलदार म्हात्रे यांना दिली. जिल्ह्यात अपुऱ्या आरोग्य सुविधांचा प्रश्‍न गंभीर होता. याविरोधात आवाज उठवला गेला. त्यानंतर तत्कालीन पालकमंत्री दीपक केसरकर यांच्या प्रयत्नाने मल्टिस्पेशालिटी रुग्णालय मंजूर झाले. विधानसभा निवडणुकीपूर्वी सध्याच्या कुटीर रुग्णालयाच्या परिसरात याचे भूमिपूजन झाले होते. मात्र, न्यायालयीन प्रक्रियेमुळे या रुग्णालयाचे पुढचे काम थांबले आहे; मात्र आता या रुग्णालयाची लवकर उभारणी करावी, अशी मागणी स्थानिकांतून सुरू असल्याने अखेर शासनस्तरावर तसा निर्णय घेण्यात आला. येथील महसूल विभागाला शासकीय जमिनीची माहिती देण्यास सांगितले. यात पोलिस परेड मैदानाच्या बाजूला आठ एकर जागा शासकीय मालकीची असून या जागेचा पर्याय निश्‍चित करावा, अशी मागणी केली आहे. त्रुटी तत्काळ दूर करा जागेची पाहणी खासदार राऊत यांनी केली. तहसीलदार म्हात्रे, बांधकामचे कार्यकारी अभियंता देसाई यांना जागेबाबत काय त्रुटी असतील, तर लवकरात लवकर दूर करा, असे सांगितले. या जागेचा प्रस्ताव तातडीने आरोग्य विभागाकडे देण्याच्या सूचनाही केल्या आहेत. उपजिल्हा रुग्णालयापासून ही जागा दहा मिनिटाच्या अंतरावर असल्याने या जागेबाबत तातडीने विचार करू, असे आश्‍वासन राऊत यांनी दिले आहेत. News Story Feeds https://ift.tt/eA8V8J

via News Story Feeds https://ift.tt/2XtbscE