कुजलेला मृतदेह कुणाचा? शवागारातील दुर्गंधीने उपस्थित केला प्रश्‍न अमरावती : पाच दिवसांपासून जिल्हा सामान्य रुग्णालयाच्या शवागारात पडून असलेला मृतदेह कुजल्याने दुर्गंधी पसरली. हा कुजलेला मृतदेह कुणाचा? या प्रश्‍नाने इर्विन प्रशासन भांबावून गेले होते. शवागारातील कोल्ड स्टोअरेज निकामी झाल्याची बाब आता पुढे आली. ओपीडीत 23 जून रोजी दाखल व्यक्तीचा मृत्यू झाल्यानंतर पोलिस चौकीत मेमो न पाठविल्याने हा पेच निर्माण झाल्याचे निदर्शनात आले. सोमवारी (ता. 29) शहर कोतवाली पोलिसांनी बेवारस मृतदेह म्हणून त्यावर अंत्यसंस्कार केले. 23 जून रोजी शहरातील दीपक चौकात वाहनाने धडक दिल्याने अनोळखी व्यक्ती गंभीर जखमी झाली होती. वाहतूक शाखेच्या पोलिसांनी जखमी व्यक्तीला उपचारासाठी दुपारी साडेबाराच्या सुमारास इर्विनच्या ओपीडीमध्ये दाखल केले. जखमी असल्यापासून प्रकृती गंभीर असल्याने त्याचे नाव समजू शकले नाही. दाखल व्यक्तीला कुणी व केव्हा आणले, पहिल्या दिवसाची पोलिस इन्फॉर्म (मेमो)ची नोंद आहे. इर्विन चौकीने कोतवाली ठाण्यात कळविलेसुद्धा होते. परंतु, त्याच दिवशी सायंकाळी सव्वासातच्या सुमारास जखमी व्यक्तीचा मृत्यू झाला. मृत्यूनंतर ड्यूटीवरील डॉक्‍टरांनी मृतदेह वॉर्डबॉयच्या माध्यमातून शवागारात ठेवला. परंतु, मृत पावलेल्या व्यक्तीची माहिती तत्काळ पुन्हा मेमोद्वारे इर्विनच्या पोलिस चौकीत दिली नाही. अखेर पाच दिवस शवागारात कोल्ड स्टोअरेजची मशिनरी उत्तम स्थितीत नसल्याने दुर्गंधी पसरली होती. पाचव्या दिवशी रविवारी (ता. 28) मृतदेह कुणाचा? याबाबत इर्विन प्रशासन भांबावून गेले. उशिरा रात्री मृत झालेली व्यक्ती 23 जून रोजी दाखल झालेली असल्याचे कळले. त्यामुळे इर्विन प्रशासनाने शहर कोतवाली ठाण्यास पत्र लिहून माहिती दिली. आज अंत्यसंस्कार होईपर्यंतही मृत व्यक्तीची ओळख पटू शकली नाही. ज्यांनी मृतदेह आणला त्या वाहतूक पोलिसांनी किंवा इर्विन ओपीडीमधील डॉक्‍टरांपैकी कुणीही शहर कोतवाली पोलिस किंवा इर्विन चौकीत मृत्यूनंतरच्या दस्तऐवजांसह माहिती न दिल्याने हा पेच निर्माण झाल्याचे इर्विन प्रशासनाने सांगितले. हेही वाचा : अगर जिंदा छोडा तो तेरा गेम कर दूंगा...आणि नंतर घडले हे... शवागारात कोल्डरूम नाही, फक्त कोल्ड स्टोअरेज म्हणून वापर होतो. तेथील मशीनरी जुनी झाली आहे. वारंवार दुरुस्ती करून काम चालविले जात आहे. संबंधित यंत्रणेला तशी माहिती दिली आहे. स्टोअरेज वारंवार उघडावे लागते किंवा वीजपुरवठा खंडित झाल्याने जास्त दिवस झालेल्या मृतदेहाची दुर्गंधी येऊ शकते. -डॉ. सतीश हुमने, निवासी जिल्हा शल्यचिकित्सक, इर्विन रुग्णालय News Story Feeds https://ift.tt/eA8V8J

via News Story Feeds https://ift.tt/2Bfvkro