धन्यवाद नागपूरकर, तुमच्या दातृत्वामुळे मिळू शकली या गरजू खेळाडूंना मदत... नागपूर : लॉकडाउनमुळे सध्या आर्थिक अडचणीत सापडलेल्या शहरातील युवा खेळाडूंच्या समस्यांवर दैनिक "सकाळ'ने वृत्तमालिका प्रकाशित केल्यानंतर, या खेळाडूंच्या मदतीसाठी असंख्य हात पुढे सरसावले आहेत. अनेकांनी आंतरराष्ट्रीय महिला धावपटू प्राजक्‍ता गोडबोले, ज्योती चौहान, निकिता राऊत, सायली वाघमारे व दिव्यांग तिरंदाज संदीप गवईला अन्नधान्य व रोख स्वरुपात मदत करून सामाजिक बांधिलकी जपली. "सकाळ'च्या वृत्ताची दखल घेत आमदार मोहन मते व मनपाचे क्रीडा अधिकारी पीयुष आंबुलकर यांनी संदीपच्या निवासस्थानाला भेट देऊन, त्यास एक महिन्याचे राशन व किराणा दिला. यावेळी श्री. मते यांनी संदीपच्या नोकरीसाठी क्रीडामंत्री सुनील केदार यांच्याशी चर्चा करणार असल्याचे सांगितले. तसेच अर्धांगवायूने आजारी असलेल्या संदीपच्या आईच्या औषधपाण्याची व्यवस्थाही केली. एमसीसी गोल्डन ग्रुपने प्राजक्‍ता, ज्योती व निकिताला राशन किट दिली. याशिवाय राष्ट्रसंत तुकडोजी महाराज नागपूर विद्‌यापीठातर्फेही त्यांना अन्नधान्य व राशनची मदत करण्यात आली. आमदार समीर मेघे यांनी ज्योतीच्या परिवाराला राशन किट दिली. तर विवेक मेंढी यांनी तिच्या परिवाराला एक महिन्याचे राशन दिले. तसेच प्रभाताई ओझा यांनी पाच हजार रुपये आणि मनपाचे प्रमोद तभाने यांनी दीड हजार रुपयांची मदत केली. प्राजक्‍ताला मोहल्ल्यातील नागरिकही मोठ्या प्रमाणावर अन्नधान्याची मदत करीत असल्याचे तिने सांगितले. हैदराबाद, पुणे व अन्य ठिकाणांहूनही मदतीसंदर्भात फोन आल्याचे ती म्हणाली. - पोलिसांनी पाठवलेल्या बनावट ग्राहकाने आणले चक्क हरणाचं मटण, मग... सायलीलाही नोकरीसाठी मदत करण्याचे आश्‍वासन मिळाले आहे. लॉकडाउनमुळे हे सर्व खेळाडू सध्या आर्थिक अडचणीत असून, त्यांच्यावर उपासमारीची वेळ आली आहे. शिवाय "सकाळ'ने त्यांच्या नोकरीचाही प्रश्‍न लावून धरला आहे. आतापर्यंत देशभरातील असंख्य दानशूर व्यक्‍तींनी चौघांनाही मदतीचा हात दिला आहे. संकटाच्या क्षणी दखल घेतल्याबद्‌दल या खेळाडूंनी "सकाळ'ला धन्यवाद दिले आहेत. News Story Feeds https://ift.tt/eA8V8J

via News Story Feeds https://ift.tt/2At0muR