567 प्रकल्पांना परवानगी तर 323 प्रकल्पांमध्ये उत्पादनास प्रारंभ सोलापूर : लॉकडाउनमुळे व कोरोनाच्या वाढत्या रुग्णसंख्येमुळे रेड झोनमध्ये गेलेल्या सोलापूर जिल्ह्यातील अनेक औद्योगिक प्रकल्प गेल्या अनेक दिवसांपासून बंद होते. मात्र सुरक्षेच्या दृष्टीने उपाययोजना करून उत्पादने घेणाऱ्या प्रकल्पांना एमआयडीसीने परवानगी दिली असून, एमआयडीसी पोर्टलवरील माहितीनुसार आलेले 567 अर्जांना परवानगी मिळाली आहे. प्रत्यक्षात 323 प्रकल्प सुरू झाले आहेत. लॉकडाउननंतर बंद करण्यात आलेल्या जिल्ह्यातील कारखान्यांना शासनाने घालून दिलेल्या सुरक्षा नियमांच्या अधीन राहून उत्पादने घेण्याच्या सूचना देण्यात आल्या आहेत. त्यानुसार permission.midcindia.org या संकेतस्थळावर 567 अर्ज दाखल झाले आहेत. संकेतस्थळावरील माहितीनुसार, या सर्व औद्योगिक प्रकल्पांना परवानगी मिळाली आहे. त्यापैकी 323 औद्योगिक प्रकल्प सुरू झाले आहेत. डाळ मिल, ऑइल मिल, सॅनिटायझर उत्पादन, मास्क, शेती उपयोगी उत्पादने, खते, बी-बियाणे, रासायनिक व औषध निर्माण प्रकल्प यांचा यात समावेश आहे. प्रकल्प सुरू झालेल्या कारखानदारांनी संकेतस्थळावर भरलेल्या माहितीनुसार या सर्व प्रकल्पात सात हजार 152 कामगार कार्यरत आहेत. कामगारांना सुरक्षा साधने पुरविली असून, सोशल डिस्टन्सिंग व शासनाने घालून दिलेल्या अटी व नियमांचे पालन केले जात आहे. कामगारांची ने-आण करण्यासाठी पाच वाहनांना सुरक्षा पास देण्यात आले आहेत. 140 औद्योगिक प्रकल्पांनी 388 वाहनांसाठी पासची मागणी केली आहे मात्र अद्याप या वाहनांना पास देण्यात आले नाही. ३२३ प्रकल्प सुरु सध्या जिल्ह्यातील सूक्ष्म, लघू आणि मध्यम असे 323 औद्योगिक प्रकल्प सुरू झाले असल्याची माहिती एमआयडीसीच्या पोर्टलवरून मिळत आहे. हे प्रकल्प जिल्ह्यातील कुठल्या भागातील आहेत, याची माहिती नाही. शहरातील उद्योगही शासनाने घालून दिलेल्या शर्थी, अटी व नियमांना अधीन राहून सुरू होऊ शकतात. - बाळासाहेब यशवंते, महाव्यवस्थापक, जिल्हा उद्योग केंद्र News Story Feeds https://ift.tt/eA8V8J

via News Story Feeds https://ift.tt/3bi8OKl