विसापूर जेलमधून २३ कैद्यांना सोडले नगर : विसापूर (ता. श्रीगोंदे) येथील खुल्या कारागृहात जन्मठेपेची शिक्षा भोगणाऱ्या 23 बंदिवानांना अभिवचन रजेवर पाठविण्यात आले आहे. कारागृह सुरक्षा यंत्रणेने त्यांना खासगी वाहनातून त्यांच्या गावी पोचविले. दरम्यान, कारागृहातील 60 बंदिवानांना अभिवचन रजेवर सोडण्यात येणार असल्याची माहिती सूत्रांकडून मिळाली. विसापूर येथील खुल्या कारागृहात सिद्धदोष झालेल्या बंदिवानांना ठेवण्यात येते. 200 बंदिवानांची क्षमता असलेल्या या कारागृहात 97 बंदिवान आहेत. कोरोनाच्या पार्श्‍वभूमीवर कारागृहातील कैद्यांना अभिवचन रजेवर सोडण्याचा निर्णय सरकारने घेतला. त्यानुसार विसापूर कारागृहात जन्मठेपेसह विविध गुन्ह्यांत शिक्षा झालेल्या कैद्यांना अभिवचन रजेवर घरी सोडण्याच्या हालचाली सुरू आहेत. त्यात यापूर्वी ज्या बंदिवानांना अभिवचन रजा दिली होती आणि ते वेळेत पुन्हा हजर झाले, अशा बंदिवानांना आता 45 दिवसांसाठी काही अटी-शर्तींवर रजा दिली आहे. कारागृहातून मुक्तता झाल्यानंतर संबंधित बंदिवानाने बरोबर 45 दिवसांनी पुन्हा हजर राहणे बंधनकारक आहे. तसे न झाल्यास बंदिवानावर कारवाई करण्यात येईल. हेही वाचा - मुख्यमंत्र्यांनी केली नगरमध्ये गुंतवणूक सिद्धदोष बंदिवानांना अभिवचन रजेवर सोडण्याचा निर्णय शासनाने 8 मे रोजी घेतला होता. त्यानुसार विसापूर कारागृहातील पात्र 23 बंदिवानांना त्याच्या मूळ गावी जाण्यास परवानगी दिली आहे. त्यासाठी कारागृहाने वाहनांची व्यवस्था केली. उर्वरित 30 बंदिवानांनाही अभिवचन रजेवर सोडण्यात येणार आहे. कोरोना संकटाची परिस्थिती सुधारल्यानंतर बंदिवानांनी तत्काळ कारागृहात हजर होणे आवश्‍यक आहे. मात्र, परिस्थिती न सुधारल्यास शासनाच्या आदेशात मुदतवाढ होण्याचीही शक्‍यता आहे. बंदिवानांना ओळखपत्रे बंदिवानांना मूळ गावी किंवा शहरात सोडण्यात येणार आहे. मात्र, शहरात सोडल्यानंतर पोलिसांनी अडवू नये, यासाठी त्यांना ओळखपत्रे देण्यात आली आहेत, जेणे करून ते सुखरूप घरी पोचतील. कोरोनाचा प्रादुर्भाव रोखण्यासाठी शासनादेशानुसार विसापूर कारागृहातील बंदिवानांना 45 दिवसांच्या अभिवचन रजेवर सोडले जात आहे. रजा संपल्यानंतर त्यांनी पुन्हा हजर होणे बंधनकारक आहे. - पी. पी. परदेशी, अधीक्षक, विसापूर खुले कारागृह News Story Feeds https://ift.tt/eA8V8J - Click Live News Short news on Mobile 2019.....