भाजप नगरसेवकांनी दिले महिन्याचे मानधन ; शिवसेनेची प्रतिक्षा सोलापूर : राज्यभरात कोरोनाचा प्रादुर्भाव वाढल्याने महापालिकेतील भाजप, वंचित आघाडी, राष्ट्रवादी आणि मार्क्‍सवादी कम्युनिस्ट पक्षाच्या नगरसेवकांनी आपले एक महिन्याचे मानधन पंतप्रधान आणि मुख्यमंत्री मदत निधीला देण्याचा निर्णय घेतला आहे. भाजपच्या 48 नगरसेवकांनी त्यांच्या एक महिन्याचे मानधन सुमारे साडेचार लाख रुपये जिल्हाधिकाऱ्यांमार्फत पंतप्रधान सहायता निधीला पाठवले आहे. निधी देण्यासंदर्भात महापौर श्रीकांचना यन्नम आणि पक्षाच्या पातळीवर आवाहन करण्यात आले होते. त्यानुसार पालिकेतील सर्व नगरसेवकांनी त्यांचे महिन्याचे मानधन पंतप्रधान सहायता निधीला देण्याचे पत्र नगरसचिवांना दिले. त्यानुसार नगरसचिव रऊफ बागवान यांनी नगरसेवकांनी दिलेल्या पत्रानुसार त्यांच्या मानधनाची रक्कम जिल्हाधिकारी कार्यालयात जमा केली. तेथून ही रक्कम पंतप्रधान सहायता निधीत जमा झाली. वंचित बहुजन आघाडीचे आनंद चंदनशिवे, ज्योती बमगोंडे व गणेश पुजारी हे तीन नगरसेवक आहेत. या तिघांनीही त्यांच्या महिन्याचे मानधन मुख्यमंत्री मदत निधीस द्यावे, असे पत्र आयुक्तांकडे दिले आहे. मार्क्‍सवादी कम्युनिस्ट पक्षाच्या एकमेव नगरसेविका कामिनी आडम यांनीही आपल्या एक महिन्याचे मानधन मुख्यमंत्री निधीत जमा करण्याचे पत्र आयुक्तांकडे दिले आहे. हे पत्र आता नगरसचिवांकडे जाईल, तेथून ते जिल्हाधिकारी कार्यालयामार्फत मुख्यमंत्री निधीत जमा होणार आहे. राष्ट्रवादी कॉंग्रेसच्या चारही नगरसेवकांचे मानधन मुख्यमंत्री सहायता निधीला देणार असल्याचे गटनेते किसन जाधव यांनी सांगितले. कॉंग्रेसचे महापालिकेत 14 नगरसेवक आहेत. या नगरसेवकांनी मानधनाची रक्कम कोणत्याही निधीसाठी देण्याबाबत अद्याप कोणतेही धोरण निश्‍चित केले नाही. तथापि, मानधनाच्या रकमेतून प्रभागातील गरजू व उपेक्षित लोकांना अन्नधान्य वाटण्यात येणार आहे. त्यामुळे आम्ही पंतप्रधान किंवा मुख्यमंत्री सहायता निधीत रक्कम देणार नाही, असे गटनेते चेतन नरोटे यांनी सांगितले. एमआयएमचे 10 नगरसेवक आहेत. त्यांनीही आपल्या मानधनाची रक्कम कोणाला द्यायची याबाबत निर्णय घेतला नाही. तथापि, मानधनाच्या रकमेतून महापालिकांच्या दवाखान्यांमध्ये आवश्‍यक तंत्रज्ञान उपलब्ध करण्याचा प्रस्ताव आयुक्तांना देणार असल्याचे एमआयएमचे गटनेते रियाज खरादी यांनी सांगितले. शिवसेनेचा निर्णय अद्याप नाही महापालिकेत शिवसेनेचे 21 नगरसेवक आहेत. या नगरसेवकांनीही अद्याप आपल्या मानधनाची रक्कम कुणाला द्यायची, याचा निर्णय घेतला नाही. मात्र नगरसेवक गुरुशांत धुत्तरगावकर यांनी वैयक्तिक मदत मुख्यमंत्री निधीत जमा केली आहे. तर नगरसेवक देवेंद्र कोठे यांनी आपले पंचतारांकित हॉटेल कोरोनावर उपचार करणाऱ्या डॉक्‍टरांसाठी उपलब्ध करून दिले आहे. नगरसेवक वैयक्तिक पातळीवर मदत करत आहेत, मात्र त्यांच्या मानधनाबाबत अद्याप निर्णय झालेला नाही. राज्यात शिवसेनेचे मुख्यमंत्री असताना व इतर पक्षांच्या नगरसेवकांनी मानधनाची रक्कम पंतप्रधान किंवा मुख्यमंत्री सहायता निधीत दिली असताना शिवसेनेच्या नगरसेवकांचा अद्याप निर्णय न झाल्याने आश्‍चर्य व्यक्त होत आहे. - News Story Feeds https://ift.tt/eA8V8J

via News Story Feeds https://ift.tt/2VNqNDI