Coronavirus : पुण्यातील तीन हॉस्पिटलमध्ये अतिदक्षता विभाग पुणे - कोरोनाचे रुग्ण आणि संशयितांवरील उपचारासाठी महापालिकेची हॉस्पिटल, दवाखान्यांत नव्या सुविधा उभारल्या जाणार आहेत. या योजनेत तीन रुग्णालयांत अतिदक्षता विभाग सुरू करून ५० खाटांची सोय करण्यात येणार आहे. अत्याधुनिक सेवा-सुविधाही उभारण्याचे नियोजन आहे. पुणेकर नागरिकांसह संस्था, संघटनांनी मदतीसाठी पुढाकार घ्यावा, असे आवाहन महापालिकेने केले आहे. दरम्यान, या योजनेत भवानी पेठेतील सोनावणे हॉस्पिटल, शिवाजीनगरमधील दळवी आणि बोपोडीतील खेडेकर हॉस्पिटलचा समावेश आहे. ताज्या बातम्यांसाठी डाऊनलोड करा ई-सकाळचे ऍप कोरोनाचे रुग्ण आणि संशयितांची संख्या वाढली आहे. एका रुग्णाचाही मृत्यूही झाला. या पार्श्वभूमीवर महापालिकेचे दवाखाने, हॉस्पिटलमधील सेवा-सुविधांची व्याप्ती वाढविली जाणार आहे. मात्र, कोरोनाच्या संसर्गावर मात करण्याच्या उद्देशाने नेमक्‍या आणि परिणामकारक अत्याधुनिक यंत्रणेची उभारणीला प्राधान्य दिले आहे. सध्या डॉ. नायडू रुग्णालयात केवळ सहा ‘व्हेटिंलेटर’ आहेत. ही यंत्रणा फारच तोकडी आहे. तेव्हा, या तीन हॉस्पिटलमध्ये अतिदक्षता विभाग उभारण्याचा निर्णय घेतला आहे; त्याकरिता मोठ्या निधीची गरज असल्याने पुणेकरांनी मदत करावी, असे महापालिकेचे आयुक्त शेखर गाकवाड यांनी सांगितले. दरम्यान, ‘कार्पोरेट सोशल रिस्पॉन्सिब्लिटी’ (सीएसआर) अंतर्गंत अतिदक्षता विभागाचे काम करण्यात येणार आहे. खासगी कंपन्यांचा पुढाकार अपेक्षित आहे, असे सहायक आरोग्य प्रमुख डॉ. अंजली साबणे यांनी संगितले. एकाही रुग्णालयात ‘आयसीयू’ नाही पुणेकरांच्या आरोग्याला प्राधान्य देत असल्याचे सांगणाऱ्या महापालिकेच्या ७१ पैकी एकाही रुग्णालयात अतिदक्षता विभाग नसल्याचे स्पष्ट झाले आहे. ही यंत्रणा उभारणीवर चर्चा आणि प्रस्ताव या पलीकडे महापालिकेच्या आरोग्य विभागाने काहीच कार्यवाही केलेली नाही. परिणामी कोरोनाचे संकट वाढल्याने जागे झालेल्या महापालिकेने आता ‘आयसीयू’ची सुविधा उपलब्ध करण्याच्या हालचाली सुरू केल्या आहेत. महापालिकेच्या आरोग्य खात्यावर दरवर्षी साडेतीनशे ते पावणेचारशे कोटी रुपये खर्च होतात. तरीही ‘आयसीयू’ नसल्याने आश्‍चर्य व्यक्त करण्यात येत आहे. News Story Feeds https://ift.tt/eA8V8J - Click Live News Short news on Mobile 2019.....