`या` महापालिका शिक्षकांच्या सातव्या वेतन आयोगाचा प्रस्ताव लटकणार सोलापूर : महापालिका प्राथमिक शिक्षण मंडळाकडील शिक्षकांना सातवा वेतन आयोग लागू करण्यासंदर्भातील प्रस्तावावर सत्ताधारी पक्षामध्ये मतभेद दिसून आले. त्यामुळे सोमवारी होणार्या महापालिकेच्या सभेत या प्रस्तावावर निर्णय न घेता प्रस्ताव तूर्त तहकूब करण्याचा निर्णय शुक्रवारी रात्री झालेल्या पार्टी मिटिंगमध्ये घेण्यात आला. महापालिकेतील कर्मचाऱ्यांना सातव्या वेतन आयोगाच्या शिफारसी लागू करण्यासंदर्भात अद्याप प्रस्ताव आलेला नाही. दरम्यान, शिक्षण मंडळाला वेतनासाठी 50 टक्के रक्कम ही शासनाकडून मिळते, तर महापालिकेला 50 टक्के रक्कम द्यावी लागते. त्यामुळे शिक्षकांना वेतन आयोगाच्या शिफारसी लागू करण्याचा प्रस्ताव फेब्रुवारीच्या विषयपत्रिकेवर पाठविण्यात आला होता. मात्र त्यावेळी सभा तहकूब झाल्याने निर्णय झाला नाही. शुक्रवारीही सभा तहकूब झाल्याने हा प्रस्ताव प्रलंबितच राहिला. दरम्यान शुक्रवारी रात्री पार्टी मिटिंग झाली. त्यावेळी हा विषय चर्चेला आल्यावर, भाजपमध्ये दुमत असल्याचे दिसून आले. शिक्षकांना वेतन आयोग लागू केले तर महापालिकेतील कर्मचाऱ्यांनाही आयोगाच्या शिफारसी लागू कराव्या लागतील, महापालिकेची आर्थिक स्थिती तितकीशी चांगली नाही, असे मत काही नगरसेवकांनी व्यक्त केले. तर हा प्रस्ताव प्रशासनाकडूनच आल्याने तो लागू करण्यात अडचण नाही, अशीही भूमिका काही नगरसेवकांनी घेतली. मात्र दोन्ही बाजूचे नगरसेवक आपापल्या भूमिकेवर ठाम राहिल्याने अखेर या प्रस्तावाबाबत पक्षाचे दोन्ही आमदार व शहराध्यक्ष यांच्याशी चर्चा करून निर्णय घेण्याचे ठरले. त्यामुळे ठरावाच्या निर्णयाकडे डोळे लावून बसलेल्या महापालिका प्राथमिक शिक्षण मंडळाकडील शिक्षक व शिक्षकेतर कर्मचार्यांचा तूर्त अपेक्षाभंग होणार आहे. News Story Feeds https://ift.tt/eA8V8J

via News Story Feeds https://ift.tt/2TLkoXG