सिंधुदुर्गातील 465 अंगणवाड्या जागेच्या प्रतीक्षेत ओरोस (सिंधुदुर्ग) - जिल्ह्यात तब्बल 465 अंगणवाड्यांना स्वतःची जागा नाही. या अंगणवाडी प्राथमिक शाळा, खासगी इमारत, समाज मंदिर अथवा अन्य जागेत आश्रय घेवून भरविल्या जात आहेत. जिल्ह्यात नियमित अंगणवाडी 1 हजार 244 तर मिनी अंगणवाडी 352, अशा एकूण 1 हजार 596 अंगणवाड्या मंजूर आहेत. यातील नियमित 1 हजार 242 तर मिनी 345, अशा मिळून एकूण 1 हजार 587 अंगणवाडी कार्यान्वित आहेत. यामध्ये नियमित 956 तर मिनी 166 अशा एकूण अंगणवाडी स्वतःच्या इमारतीत भरतात तर 287 नियमित अंगणवाडीला आणि 178 मिनी अंगणवाडीला स्वतःची इमारत नाही. एकूण 465 अंगणवाडी मालकीच्या इमारतीत भरल्या जात नाहीत. त्यांना अन्य आसरा घ्यावा लागला आहे. यामुळे या अंगणवाडीला मालकीची इमारत मिळणे गरजेचे आहे. अन्यत्र भरविल्या जाणाऱ्या 465 अंगणवाड्यांमध्ये 89 नियमित आणि 73 मिनी मिळून 162 अंगणवाड्या खासगी इमारतीत भरविल्या जात आहेत. प्राथमिक शाळेच्या इमारतीत नियमित 139 आणि 94 मिनी मिळून 233 अंगणवाड्या भरविल्या जात आहेत. समाज मंदिर आणि अन्यत्र मिळून नियमित 59 आणि 11 मिनी, अशा 70 अंगणवाड्या भरविल्या जात आहेत. पाच कोटी 39 लाखांचा आराखडा अंगणवाडी नवीन इमारत बांधकाम, दुरुस्ती आणि शौचालय आदींसाठी 5 कोटी 39 लाखांचा आराखडा प्रस्तावित करण्यात आला आहे. यासाठी लागणाऱ्या निधीसाठीचा प्रस्ताव जिल्हा नियोजन समितीकडे सादर करण्यात येणार आहे. अंगणवाडी इमारतीची 53 नवीन बांधकामे, 83 अंगणवाड्यांची दुरुस्ती आणि 23 शौचालय बांधणे आवश्‍यक आहे; मात्र यासाठी निधी उपलब्ध नसल्याने नियोजन समितीकडे निधीची मागणी करण्याचा निर्णय यापूर्वीच घेतला होता, अशी माहिती महिला व बालकल्याण सभापती माधुरी बांदेकर यांनी दिली. वर्षाला भाडे एकोणीस लाखावर जिल्ह्यातील 465 अंगणवाडीला मालकीची इमारत नाही. त्यामुळे प्राथमिक शाळा, समाज मंदिर किंवा भाड्याच्या जागेत अंगणवाडी भरवावी लागत आहे. यासाठी जिल्हा परिषदेला महिन्याला भाडे द्यावे लागत आहे. जिल्ह्यात सध्या 161 अंगणवाडी भाड्याच्या जागेत भरविल्या जात आहेत. यासाठी एका महिन्याला एका अंगणवाडीला 1 हजार रुपये भाडे भरावे लागत आहे. 161 अंगणवाडीला एका महिन्यासाठी एक लाख 61 हजार रुपये मोजावे लागतात. परिणामी एका वर्षात 19 लाख 32 हजार रुपये भाड्यापोटी खर्च येत आहे. आवश्‍यक निधीचा आराखडा तयार झाला असून तो नियोजन समितीकडे मान्यतेसाठी पाठवण्यास नुकत्याच झालेल्या महिला व बाल कल्याण समिती सभेत मान्यता घेतली आहे. - माधुरी बांदेकर, सभापती, महिला व बालकल्याण संपादन - राहुल पाटील News Story Feeds https://ift.tt/eA8V8J

via News Story Feeds https://ift.tt/36GnpyM