कोरोना संकटातही ज्ञानदान, ज्ञानार्जनासाठी `अशी` धडपड बांदा (सिंधुदुर्ग) - कोरोनाचे जैविक संकट दिवसेंदिवस गंभीर होत असल्याने शैक्षणिक वर्ष अद्यापही सुरू होण्याची शक्‍यता कमी आहे. या पार्श्‍वभूमीवर शहरातील अनेक खासगी शाळांनी ऑनलाईन शिक्षण देण्यास सुरुवात केली आहे. ग्रामीण भागात नेटवर्कचा अभाव असल्याने पालक आपल्या पाल्यांना शहरात येऊन मोबाईलवर ऑनलाईन शिक्षणाचे धडे देत आहेत. कोरोनाचे संकट सुरू झाल्यावर मार्चच्या अखेरीस शाळा, महाविद्यालये बंद ठेवण्याचा निर्णय शासनाने घेतला. उन्हाळी सुट्टी संपल्यानंतर दरवर्षी 15 जूनला नवीन शैक्षणिक वर्षाची सुरुवात होते; मात्र कोरोनाग्रस्तांची संख्या ही दिवसेंदिवस वाढतीच आहे. ग्रामीण भागातही कोरोनाने शिरकाव केल्याने शाळा सुरू होण्याबाबत अद्यापही अनिश्‍चितता कायम आहे. त्यामुळे अनेक शाळांनी ऑनलाईन शिक्षण देण्याचा निर्णय घेतला आहे. जिल्हा परिषद शाळा बंद असल्याने शिक्षकांनी वर्गवार व्हॉट्‌सऍपच्या समूहाची निर्मिती केली. त्या माध्यमातून मुलांना दररोजचा अभ्यास पाठविण्यात येतो. पालकांच्या मदतीने अभ्यास करून पुन्हा मुले हा अभ्यास ग्रुपवर पाठवीत आहेत. यावेळी ग्रुपवर चर्चा करून विद्यार्थ्यांच्या शंकांचे निरसन देखील शिक्षकांकडून करण्यात येते. ऑनलाईन शिक्षण देण्यात खासगी शाळांनी आघाडी घेतली आहे. इंग्रजी माध्यमाच्या खासगी शाळा या पूर्णपणे विद्यार्थ्यांच्या मासिक शुल्कावर अवलंबून असतात. शाळा बंद ठेवल्याने शासनाने विद्यार्थ्यांकडून शुल्क वसूल करू नये, असे आदेश दिले आहेत. त्यामुळे खासगी शाळा चालविणाऱ्या संस्था व शिक्षक आर्थिक अडचणीत सापडले आहेत. कित्येक खासगी शाळेतील शिक्षक हे विनावेतन काम करत आहेत. शैक्षणिक प्रवाहात मुले मागे राहू नयेत यासाठी पालकांच्या आग्रहास्तव अनेक खासगी शाळांनी ऑनलाईन वर्ग सुरू केले आहेत. या माध्यमातून विज्ञान, गणित, इंग्रजी या महत्त्वाच्या विषयांचे वेळापत्रक तयार करून पालकांना दिले आहे. यासाठी झूम, गुगल मिटसारख्या ऍपचा वापर होत आहे. ऑनलाईन पद्धतीने शिक्षण घेताना विद्यार्थ्यांना मोबाईलचा त्रास होऊ नये, यासाठी दर 20 मिनिटांनी विद्यार्थ्यांना 10 मिनिटांची सुटी देण्यात येते. ग्रामिण भागातील विद्यार्थी शहरात ग्रामीण भागात मोबाईल रेंज मिळत नसल्याने पालक मुलांना घेऊन शहराच्या ठिकाणी येत आहेत. ऑनलाईन शिक्षण घेताना मुलांना सवय नसल्याने बऱ्याच ठिकाणी मुले व पालक हे गोंधळलेल्या स्थितीत आहेत. कोरोनाचा वाढता प्रादुर्भाव लक्षात घेता शाळा कधी सुरू होईल हे अद्याप निश्‍चित नाही. त्यामुळे हे शैक्षणिक वर्ष मुलांना ऑनलाईन शिक्षण घेऊनच पूर्ण करावे लागणार आहे. खासगी शाळातील शिक्षकांना गेले 3 महिने वेतन नसल्याने ऑनलाईन शिक्षण देताना या शिक्षकांना अनेक अडचणींना सामोरे जावे लागत आहे. संपादन ः राहुल पाटील News Story Feeds https://ift.tt/eA8V8J - Click Live News Short news on Mobile 2019.....