सोलापूर शहरात होणार `या` वाहनांचे प्रभागनिहाय सर्व्हेक्षण सोलापूर : स्मार्ट सिटीच्या दिशेने जाणाऱ्या सोलापुरात अनेक ठिकाणी रस्त्यांवर दुचाकी, तीनचाकी आणि चारचाकी वाहने बेवारस स्थितीमध्ये उभी असल्याचे दिसून येत आहे. अशा बेवारस वाहनांवर, त्यांच्या मालकांवर कारवाई करण्याचे आदेश राज्य शासनाने महापालिकांना दिले आहेत. त्यासंदर्भातील आदेश महापालिकेस मंगळवारी प्राप्त झाले. नादुरुस्त झाल्याने किंवा वापरात नसल्याने अनेक वाहने सोलापुरातील प्रमुख रस्त्यांवर, गल्ली-बोळात पडून आहेत. अनेक वाहने गंजून खराब झाल्याचे दिसून येते. अशा वाहनांच्या माध्यमातून दहशतवादी कारवायांसह अन्य गुन्हेगारीच्या घटना होऊ शकतात. बॉंबस्फोट आणि अन्य घातपाती कारवायांसाठी बेवारस वाहनांचा वापर केल्याचे आजवरच्या घटनांमध्ये दिसून आले आहे. या पार्श्‍वभूमीवर शहर पोलिसांकडून बेवारस वाहनांवर कारवाईची मोहीम हाती घेण्यात येत आहे. आठवडा किंवा त्यापेक्षा जास्त कालावधीपासून बेवारस स्थितीमध्ये पडून असलेल्या वाहनांवर पोलिसांकडून कारवाई होणार आहे. ही वाहने जप्त केली जाणार असून वाहन मालकांवर गुन्हा दाखल करण्यात येणार आहे. नगरविकास विभागाने या संदर्भातील आदेश जारी केल्याच्या एक महिन्यांच्या आत बेवारस वाहने शोधण्याची मोहीम सुरू करणे महापालिकेवर बंधनकारक आहे. त्यासाठी पोलिस, महापालिका व परिवहन विभाग संयुक्तपणे मोहीम राबविणार आहे. या मोहिमेचे संपूर्ण नियंत्रण महापालिका आयुक्तांकडे असणार असून, त्यासाठी उपायुक्त दर्जाच्या अधिकाऱ्याची नियुक्ती केली जाणार आहे. ही मोहीम एक महिना राबविण्यात येणार आहे. अशी होईल कार्यवाही - तीन दिवसांच्या सर्वेक्षणानंतर वाहनावर सात दिवसांची नोटीस डकविण्यात येईल. - बेवारस वाहनाचे छायाचित्र टिपण्यात येईल. - सात दिवसांपेक्षा कमी कालावधीची नोटीस देण्याचे अधिकार महापालिकेला आहेत - नोटीस देऊनही न हटविलेली वाहने लावण्यासाठी विशेष जागेची व्यवस्था होईल - नोटीस कालावधी संपल्यावरही जी वाहने नेली जाणार नाहीत, त्याबाबत पोलिस व परिवहन कायद्यानुसार कारवाई होईल News Story Feeds https://ift.tt/eA8V8J

via News Story Feeds https://ift.tt/38iIFJW