`कोरोना`ची धास्ती, तरीही भरवला आठवडा बाजार मालवण (सिंधुदुर्ग) - "कोरोना'च्या पार्श्‍वभूमीवर नागरिकांच्या आरोग्याच्या दृष्टिकोनातून आजचा आठवडा बंद ठेवण्याचा तहसीलदारांनी दिलेला आदेश मुख्याधिकाऱ्यांनी धुडकावत आठवडा बाजार सुरू ठेवण्याच्या सूचना दिल्या. आठवडा बाजारात मोठी गर्दी होत असल्याने नागरिकांचे आरोग्य धोक्‍यात आणणारा निर्णय मुख्याधिकाऱ्यांनी घेतल्याने संतप्त नगराध्यक्ष महेश कांदळगावकर यांनी मुख्याधिकाऱ्यांना लेखी खुलासा करण्याचा सूचना दिल्या आहेत. नगराध्यक्ष कांदळगावकर यांनी आमदार वैभव नाईक तसेच तहसीलदार अजय पाटणे यांचे लक्ष वेधले. याप्रकरणाची दखल घेत तहसीलदारांनी आठवडा बाजार सुरू ठेवल्याने याचे लेखी स्पष्टीकरण देण्याचे आदेश मुख्याधिकाऱ्यांना दिले. "कोरोना'च्या पार्श्‍वभूमीवर प्रांत वंदना खरमाळे यांनी सोमवारचा आठवडा बाजार बंद ठेवण्याच्या सूचना दिल्या. याची माहिती त्यांनी मुख्याधिकाऱ्यांनाही दिली. त्यानुसार आज भरणारा आठवडा बाजार बंद राहील असे आवाहन केले होते. मात्र त्यानंतरही आज सकाळी आठवडा बाजार भरला. पालिका प्रशासनाच्या काही कर्मचाऱ्यांनी बाजारात जात विक्रेत्यांना माघारी परतण्याच्या सूचना दिल्या. काही विक्रेते बाजार सोडून माघारी परतले. मात्र पालिकेचे कर्मचारी माघारी परतल्यावर पुन्हा बाजार भरला. यात मुख्याधिकाऱ्यांनी बाजार सुरू ठेवण्यात यावा अशा सूचना दिल्यानेच बाजार सुरू करण्यात आला. यात बाजारात आलेल्या विक्रेत्यांकडून संबंधित ठेकेदाराने वसुलीही केल्याचे सांगण्यात आले. बाजाराच्या निमित्ताने होणाऱ्या गर्दीमुळे नागरिकांचे आरोग्य धोक्‍यात येऊ नये या दृष्टिकोनातून आठवडा बाजार बंद ठेवण्याचा निर्णय घेतला होता; मात्र मुख्याधिकाऱ्यांनी भाजी विक्रीमुळे काहीही होणार नाही, असे सांगत बाजार सुरू ठेवला आहे. यात काहीजण राजकारण करत असल्याचे नगराध्यक्ष महेश कांदळगावकर यांनी सांगितले. "कोरोना' जागतिक साथरोग घोषित केल्याने नागरिकांच्या आरोग्याच्या दृष्टीने आवश्‍यक खबरदारी घेणे आवश्‍यक असताना मुख्याधिकाऱ्यांनी याकडे गांभीर्याने लक्ष न देता मनमानीपणा केला. याबाबत तीव्र संताप व्यक्त करत त्यांनी मुख्याधिकाऱ्यांना लेखी खुलासा करावा, अशी नोटीस बजावली. तहसीलदारांचे लक्ष वेधले नगराध्यक्ष कांदळगावकर यांनी तहसीलदार पाटणे यांचे लक्ष वेधले असता मुख्याधिकारी जयंत जावडेकर यांना तत्काळ तहसील कार्यालयात बोलावून घेतले. यावेळी कांदळगावकर यांनी प्रशासनाने आदेश देऊनही त्याचे मुख्याधिकाऱ्यांनी पालन न करता आठवडा बाजार सुरू ठेवला, असे सांगितले. यावर तहसीलदारांनी वरिष्ठांचे आदेश असतानाही बाजार कोणत्या आधारे सुरू ठेवला त्याचे लेखी स्पष्टीकरण देण्याचे आदेश मुख्याधिकाऱ्यांना दिले. News Story Feeds https://ift.tt/eA8V8J

via News Story Feeds https://ift.tt/2wcllQX